ANNINSULA

ANNINSULA

locus Galliae in Cenomanis veterrimô insignis Monasteriô, cui a flumine, vel potius amniculo praeterfluente nomen. Vulgo S. Carileffi Monasterium, Saint Cales appellatur, a Carileffo Arverno Presbytero et Monacho Maximi Mitiacensis Abbatis discipulo, qui illud, regnante Childebertô maiore Chlodovei filiô, consensu Innocentii Cenomanorum Episcopi exstruxit, et quo Chilpericus Rex Meroveum filium suum Presbyterum ordinatum misit, ut Sacerdotali regulâ erudiretur. Quibusdam Monasterium et locus Monasterii Anisola vocatur a fluvio, et olim Casa Caiani locus dictus esse fertur; vulgo nunc Anille, a nomine loci, nunc Saint Calais, ut dictum, a nomine Patroni, Hadr. Vales. Notit. Gall.